新居屋網上申請限時XX分鐘？咪一樣爭崩頭！

　　新居屋又嚟啦！上次52折冇份嘅朋友們，今次就變咗59折，雖然係就係就貴過上次少少，但點都平過私樓一大截！Jenny都想入手呀！

可網上填表 超額認購倍數UP！UP！UP！

　　聽聞今年房委會終於的起心肝，首次開放網上申請～不過其實房協早喺前年就有㗎啦，Jenny覺得房委會而家先跟上，真心有啲遲囉！不過遲到好過冇到，有埋呢個途徑，Jenny估申請人數應該會再創新高，上年有4431個單位，房委會就收到27.2萬份申請表格，超額認䐟有成60.4倍！不如大家開個盤，估下今年又會超額認購幾多倍呢？

　　不過Jenny最擔心就唔係今次超額幾多倍，事關反正抽居屋一直都係被大家形容為買六合彩──「運氣話嚟就嚟」，亦都代表「話唔嚟就唔嚟」！所以Jenny最關心嘅都係房委會個系統到底負唔負荷到呢？話晒都係第一次搞，如果一個唔小心好似大台第一次「普選港姐」嗰次咁，就「金翅大獲鳥」！

要限時仲冇得Save!

　　另外，大家仲要留意返，房委會話網上申請嘅話，並唔係咁簡單，皆因「申請者有不多於45分鐘填寫申請表，請預留足夠時間填寫，填寫過程中不能中途儲存資料」！雖然網上申請唔使怕填錯之後冇得塗改要拎過第二份再寫過，但係冇得Save呢下都幾唔保險！Jenny都係建議大家填之前準備晒所需資料喺電腦枱前面，再唔係嘅直接填份實體版交，咁先可以保障到自己唔會填填下夠鐘被彈走兼冇晒紀錄吖！

 　　如果填完交埋先發覺有資料填錯咗，咁點算?如果以為一樣可以網上改返，咁你就太天真喇!交表後，無論你係用實體版定網上版, 都係書面通知房委會㗎!記住喇!