蔡若蓮敗部復活做「劉江華2.0」定「見光死」?

　　林鄭曾經話自己的新班子「冇驚喜就冇驚嚇。」新教育局局長楊潤雄聽講喺教育界風評幾好，業界人士對佢做局長冇乜異議，之不過大家千祈唔好咁快鬆一口氣！Jenny從不同渠道收到風，教育局副局將由教聯會副主席蔡若蓮接手。呢個消息上個星期已經傳緊，可謂一石激起千重浪，教育界紛紛「O咀樹熊」上身（見下圖）。有人仲發起網上聯署反對佢做下屆教育副局長，何解蔡女士咁唔受歡迎嘅？

教聯教協教你分清楚

　　蔡女士曾經係教育工作者聯會副主席，現職傳統左校福建中學（小西灣）嘅校長。可能大家會搞唔清楚「教聯」同「教協」嘅分別，就等Jenny同大家簡介一下先。教聯係傳統愛國親建制組織，會員有萬六左右；教協大家都知就係泛民嗰邊嘅，現時約有9萬幾10萬會員，立法會教育界功能組別議員多年來都是由教協中人當選。

葉建源講起手下敗將灰晒機

　　今屆立法會教育界功能組別選舉入面，教協副會長葉建源取得壓倒性的45984票。而蔡若蓮得票僅18158票。早前，葉建源一聽蔡若蓮落敗後卻獲安排擔任副局長，即時大表震驚話:「大大的摑了（教育界）選民的一巴」。今日Jenny 響立會同葉建源茶聚，佢講起明明林鄭提出50億教育經常撥款，氣氛好好，仲少有地讚林鄭。但一提起蔡女士或會「升級」做副局，佢灰灰地咁講咗句:「今日唔好講呢樣嘢喇！」仲話唔希望因為一個人就而破壞咗新政府同與教育界的良好關係，Jenny完全感受到佢話語間透出嗰種無奈同不平。

　　蔡女士除咗濃厚的親中背景令佢得唔到教師選民嘅支持，亦有唔少家長抗拒，皆因佢一直支持國教及小三TSA，同埋太「紅」喇！已經有家長聯盟發起反蔡簽名。

中央原心儀蔡氏做局長 林鄭Say No成功 

　　雖然副局長及政治助理毋須報請中央任命。但政界風聲指，最初蔡女士其實是中央心儀嘅教育局局長人選（你睇中央台都畀面專訪佢就知啦），但連林鄭都覺得蔡氏在業界支持度不足，未夠力「壓場」係「燙手山芋」，所以痛陳利害後，將蔡放在副局之位，希望平衡到各方利益。

　　同大家回一回帶，教聯會轄下嘅國民教育服務中心曾推出嘅《中國模式國情專題手冊》，形容中國「進步、無私與團結」學界嘩然，呢件事可以話係為反國教運動揭開序幕，身為副主席嘅蔡女士難以置身事外。

　　另外，取消小三TSA/BCA既爭議一直都未有平息，連林鄭當選個陣都話要兌現「擱置小三TSA」嘅選舉承諾，蔡女士竟然話佢係「草率」、「討好群眾」喎。駛唔駛講得咁激動呀？

「大紅蔡」難入口　不如學劉江華封口

　　平心而論，一個議題有正反支持者好正常，有評論話蔡女士不受歡迎「原罪」是因為佢係建制派，Jenny就唔係咁諗喇！建制入面不乏叻人，只係如何去將自己包裝到「順得哥情又唔太失嫂意」就係功力所在，但蔡女士似乎「紅」得太明顯，係又講唔係又講，咪搞到反對聲音特別大囉。

　　所以有時學吓，同樣係「輸議席，贏官位」嘅劉江華局長咁，秉持著「寧願一生都不說話，都不想講假說話欺騙你」，反而仕途順風順水，連做兩屆，你話幾具參考價值呀！

未成定局仲有變數

　　根據上屆梁振英政府的經驗，副局長大多數7月中做最後「見面」，連品格審查等等的程序，大約9月中會對外正式公布。蔡若蓮參選功能組別選舉時，多次涉嫌違反選舉活動指引，選管會去年證明投訴屬實，已轉交個案畀警方跟進;加上民間反對聲拆天，到9月時係咪真係由蔡氏做副局，真係仲有少少走盞位嘅。